Regesta Imperii - Online Quellen zur Reichsgeschichte

Friedrich III. (Chmel-Anhang) - Chmel, Anh. n. CA-79

1448 Juni 8

URI Merken

Herrn Wilhelms zu Buren Vollmacht für seine Anwälde beym Kammergerichte.

"Wir Wilhelm herre zu Buren und zo Boesnichem, doin kunt ind bekennen offentlich mit desem brieve, dat als wir vurmails in den sachen des reichten, so wir vorderende weren und noch vorderende syn, vor desem allerdurchluchtichsten homeichtigisten fursten ind herren hern Frederiche Roemischen konynge etc. unserm alregnedichsten lieffsten herren ind syner konyncklychen gnaiden kamergerycht intgain Arnolden van Egmont, der sich schryvet hertzougen zo Gelren gesaczt ind gemacht hain unsern reichten anwalden ind procurator Johann van Strailen unsen dyener und wir ind dieselve procurator van unseren weigen die sachen also lange vervolget und ervordert hayn, dat der vurscreven Arnold van Egmond, der sich schryvet hertzouge zo Gelren in des heiligen Roemschen rychs acht gesprochen und verkundet ouch uns anlait erkant is uff alle rente zynsen gulte stuyre gewerbe ind alle gereichticheit des landes zoe Gelren mit namen der stede Gelren Grave Strailen Venloe Remunde Ercklens Tiell Bummell Arnheym Sucphen Harderwycke Doesberg Hattem Wagenyngen Eworch Buyren ind Boesnichem, ouch alle pantschafft hey ynne hait van dem ryche zo Nymeghen ind den tzoll zo Lobech ind uff alle andere steide sloss dorffere geltschulde zolle gulde ind guyt lygende ind varende lande ind lude des landes zo Gelren, wilche acht ind anlaitzbrieve den vurscreven sceden ouch verkundet syn, daromb den sachen vort na zo ghayn nae yrer geleigenheit vur dem vurscreven unserm alregnedichsten herren dem Roemschen konynge under syner kuniglicher gnaden camergerycht den selven Johan procurator nyet zo wederroiffen, sunder in der macht zo blyven, hain wir huyde datum dis brieffs ouch dartzo gemacht gesatz ind geordiniert unse volmeichtige anwaltde ind procurator zo dessen sachen, setzen machen ind ordinieren in crafft dis brieffs den eirsamen Arnouldus vamme Loe procurator des hoff zo Coelne ind Heynrich Beyerstorff procurator des konynglichen hoyves, sy beyde ind yrre yecklich bisonder die sachen vort na yrer geleigenheit zo vorderen ind zo vervolgen vur dem vurscreven unserm alregnedichsten herren dem Roemschen konynge ind syner konynglicher gnaden camergerycht sich mit redeneren ind vursprechen an zo dynghen zo vorderen zo clagen uff den vurscreven Arnolden van Egmond ind dey vurscreven scede ind yrer yeckliche bisonder zo anspraichen ind der wederparthien vermeinte antwerde zo wederleigen zo antwerden zo verantwerden zo wederreeden kuntschafft zuygenisse brieve bewysonge by zo brengen der wederparthye vermeynte kuntschafft zo wedersprechen ind zo wederleigen rechtlige dage und schube zo heysschen ind zo erwerven achte overachte ind noitturfftige brieve ind processe ind alle rechtlige urdell ind erkentenisse zo beholden ind zo untfangen, alle eyde sich geboeren werden zo doin andere procuratores ind anwalden vort zo setzen ind die zo wederroiffen ind alles daz zo doin, als reichtliche procuratores doin soillen off moigen zo gewyn ind zo verluys ouch allis dat zo doin ind zo volfoeren, dat wir selver doin seulden off moichten off wir egainwordlich weren ind off dis gewaltz also nyet genoich en were nach strengheit des reichten off gewonheit des konyncklichs hoyves ind gerychtes, wie dan unser alergnedichster herre der Roemscher konynck syne konygliche gnaden stathelder ind daz gerycht erkennet, daz sulche gewalt syn sulle, geben wir in under yrem jekligem und willen, daz der als syn sulle ind hye ynne gemircket ind verstanden werden ind geloyven dat daromb vast ind stede zo halden alles, daz sy off yrer yecklicher also verhandelen ind doin werden. Urkunde unses ingesiegels an desen brieff gehangen. Gegeven uff unserm sloss Heymbach na Christi geburt duysent vyerhundert ind in dem eichtindvyerczigisten jaire des eichden dages des maendtz Juny. Dair synt by an ind oever geweist die eirsamen Abell van den Heysteren, Johann van Strailen ind Diederich Swarce unse dyenere dartzo geczuyge by gevordert geroiffen ind gebeden."

Chmel n. 2453