Regestendatenbank - 201.916 Regesten im Volltext

Chmel, Regesta Friderici, Anhang

Sie sehen den Datensatz 58 von insgesamt 133.

Geleitbrief für Nicolaus von Wylak.

"Fridericus dei gratia Romanorum rex etc. Notum facimus tenore presentium universis, quod nos magnifico nobis sincere dilecto Nicolao de Wylak Wayvode Transsilvanensi Siculorumque et Themesiensi comiti oratori et ambasiatori universitatis prelatorum baronum et regnicolarum regni Hungarie ad nos pro tractatibus necessariis et mutuis colloquiis inclitissimi principis patruelis nostri carissimi Ladislai regis jamfati regni Hungarie iustitiam negotiaque regni concernentibus nobiscum pertractandis et faciendis in hanc nostram civitatem Wiennensem venienti a quadringentis equitibus et personis ad quingentorum equitum et totidem personarum numerum presentes litteras nostras salviconductus et totius securitatis damus concedimus et transmittimus per quas prefatum Nicolaum Wayvodam, hominesque secum adducendos aut mittendos cuiuscumque status dignitatis linguagii et nationis existant, usque ad numerum pretactum a data presentium, usque ad festum omnium sanctorum proxime futurum sub fide nostra christiana et in verbo regio, ac honore et dignitate nostris temporalibus fraudeque et dolo seclusis affidamus assecuramus certificamus et indubios facimus, quatenus ipse Nicolaus Wayvoda cum omni sua comitiva et familia vel sui ad nos mittendi familiares usque ad terminum prefixum tociens quociens maluerint in prefatam Wiennam venire nobiscumque et cum omnibus principibus ecclesiasticis et secularibus comitibus baronibus nobilibus militibus et cunctis familiaribus et subditis nostris convenire stare morari pausare tractare conferre et concludere, tandemque habitis tractatibus conclusis vel non conclusis ad propria vel alia que maluerint loca, salvis per omnia personis rebus et bonis eorum redire declinareque valeant atque possint, promittentes sub fide ut prefertur nostra christiana ac verbo nostro regio nec non honore et dignitate nostris prescriptis pro nobis ac pro omnibus principibus comitibus baronibus nobilibus militibus familiaribus clientibus subditis et civitatensibus nostris atque fautoribus undecumque et qualitercumque maiestati nostre adherentibus et coniunctis, cuiuscumque linguagii nationis status et dignitatis existant, ut ipse Nicolaus Wayvoda familiaresque et subditi sui ac in sua comitiva ad numerum prescriptum vel citra prout promissum est procedentes, in huiusmodi adventu mora vel reditu palam vel occulte directe vel indirecte nulla via mundi inventa vel excogitata excogitandaque seu invendienda per nos aut nostros pretactos in personis et quibusvis rebus et bonis eorum impedientur molestabuntur et quoquomodo dampnificabuntur, sed libere et absque impedimento venient et pausabunt et redibunt, quodque si per quascunque leves personas eorum scilicet familiares subditosque in eorum scilicet comitiva advenientes, aliquid dampni impedimenti seu verba iniuriosa ad nos pertinentibus aut e converso a nobis pertinentibus familiaribus et subditis prefati Weyvode inferri seu irrogari contigent, per hoc vigor assecuritatis harum litterarum nostrarum violatus nullatenus intelligatur. Sed partes teneantur ad debitam commissorum reformationem. Item quod si quippiam forent homines nostri subditi adherentes fautores seu coniuncti, qui prefatum Nicolaum Wayvodam familaresque et in sua comitiva sub presentium confidentia advenientes contra huiusmodi nostrum salvumconductum impedire molestare et dampnificare intenderent, huiusmodi nocivos homines eisdem quamprimum scire poterimus notificabimus et scire dabimus et omni potentia facultate et posse nostro eosdem ab omnibus cuiusvis conditionis dignitatis hominibus in ipso adventu mora et reditu defendemus tuebimurque et protegemus. Casu vero quo tempore medio per quoscumque subditos eiusdem Wayvode aut quospiam regnicolarum aut stipendiariorum regno Hungarie existentes invasores depredationes terrarum nostrarum nostrorumque subditorum fieri quod absit contingerent, per hoc noster salvusconductus in nullo violetur, sed in suo robore semper perseveret dolo et fraude cessantibus quibuscumque. Preterea et illud introducimus et presentibus interserimus, quodsi et in quantum memoratus Nicolaus Wayvoda aut alii fideles sui amici fautores atque familiares et sibi adherentes, sed et prelati et barones milites eorumque comitiva et familia qualiscumque et similiter eis adherentes sub presenti nostro salvoconductu atque securitate ad nos venientes et demum redeuntes maiestati nostre et quibuscumque nostris prelatis baronibus comitibus militibus nobilibus fautoribus et generaliter aliis nostris subditis cuiuscunque dignitatis honoris et status seu linguagii existant quinymmo et quondam serenissimo domino Alberto Hungarie regni nostro patruo ac olim incliti domini Elisabeth regine eius conthorali aut prelibato nostro patrueli regi Ladislao sive per literas sive verbis et factis qualitercumque et quomodocunque, sub quacumque forma verborum sponte aut coacte aliquas promissiones pollicitationes adhesiones observationes confederationes, et generaliter quecumque obligama fecissent et observare assumpsissent per quas et que videlicet is noster salvusconductus quacumque arte et ingenio seu cautela et allegatione quomodolibet posset variari et impediri, illas et eadem durante huiusmodi nostro salvoconductu prorsus et omnino fore et esse irritas annullatas decernimus ac viribus carituras et nec eas umquam tempore medio eis verbo aut facto directe vel indirecte per nos aut quoscumque alios nostros fautores et nobis adherentes et ad nos pertinentes abiciemus, in contrarium quovismodo quinymmo illis omnibus non obstantibus presentem nostrum salvumconductum semper et ubique quoad omnes suos articulos et continentius in suo vigore inviolabiliter et inconcusse volumus et decernimus remanere et sub honore et fide nostris prenotatis promittimus firmiter et irrevocabiliter observare et facere observari. In quorum omnium et singulorum premissorum firmam et inviolabilem observationem observare observarique sanctionem premisso ordine nos realiter et effective obligamus. Sigillum nostrum regium appendi iussimus. ... Datum Wienne feria quinta post festum exaltationis sancte crucis anno domini m.cccc.xlv., regni vero nostri anno sexto."

Chmel n. 1960

Nachträge

Nachtrag einreichen
Einreichen
Empfohlene Zitierweise

Chmel, Anh. n. CA-58, in: Regesta Imperii Online,
URI: http://www.regesta-imperii.de/id/1445-09-16_1_0_13_0_1_58_CA58
(Abgerufen am 28.03.2024).