Regesta Imperii - Online Quellen zur Reichsgeschichte

Friedrich III. - Chmel n. 3959

1462 Dezember 30, Neustadt

URI Mark

ertheilt den getreuen Städten Krems und Stain für ihren Beystand ein Privilegium in Betreff der Waaren-Niederlage und des Handels nach Venedig.

"- Bekennen für uns unser eribn und nachkomen das wir unsern getrewn liebn dem richter ratt und unsern burgern gemainkleich zu Krems und Stain von der trewn und gehorsamen dienst und beystands wegen so sy uns in den vergangen lewffen unczher aufrichtigkleich wider unser widersacher und besunder zu unserm auskomen aus dem besess in unser burkch zu Wienn darinn wir mit sambt unser liebn gemehel frawn Leonaren Römischn kaiserin und Maximilianen unsern unerczogen sun durch ettlich unser lantlewt in Österreich und die von Wien groblich unpillich und untrewlich furgenomen warn und in ander weg beweist habn und hinfur tuen sülln und mügn und haben in dadurch und von sundern genadn durch irer alls unser getrewn aufnemen wegn und zu ergeczung söllicher irer trewn dinst die genad getan wissenleich mit dem briefe das sy nu hinfür ewigkleich die niderlegung allerlai kaufmanschaft so vormals daselbs zu Wienn nach unserm und unserr vorvordern vergünnen gewesn mit allen den ern rechtn und gerechtigkaitn alls dy daselbs zu Wienn uncz her gehalltn ist daselbs zu Krembs und Stain habn sulln von menigkleich ungehindert ungeverlich. Auch das sy nu hinfür mit allerlay kaufmanschaft von Krembs und Stain dy strassn fur Zell und verrer durch unsere innere lanndt herscheft und gepiete hinein gein Venedig farn handeln und wandeln und widerumb heraus andre venedigische kaufmanschafft und war nach irem fueg die selb strassn fuern und pringen lassn und die daselbs zu Krembs und Stain niderlegn auch da und andern enntn wo in das füeget an werden verkauffen und vertreibn mügen, doch das sy den bemelltn von Wienn und anndern unsern widersachern dieweil die gegenwürtigen kriegslewff in unserm fürstentum Österreich wern und sy uns alls yerem eribherrn und lanndesfürstn nicht gehorsam sein durch sich selbs oder ander nichts zu bringen noch des verkauffen, auch mewtt und zöll so sich davon ze gebn gepüern vor behalliten und andern unsern stetn an iren niderlegungen unvergriffenlich und an schadn. Davon gebietn wir den edeln unsern liebn getrewn allen unsern haubtlewtn graven freyen herrn rittern und knechtn verwesern huebmaistern pflegern burgkgraven vicztumben burgermaistern richtern reten burgern hannsraven gemainden und allen andern unsern ambtlewtn undertanen und getrewen ernstlich und welln das sy die obgemeltn unser burger zu Krembs und Stain bey den obbemelten unsern genadn der niderleg genczleich beleibn und sy mit irer war und kauffmanschafft gen Venedig und widerumb heraus nu hinfür ewigkleich ungeirrett und ungehindert handeln wandeln und durchkumen lassn und sy und die iren dawider nicht anvallen dringen bekumern noch besweren. Noch des yemands in ze tuen gestatten in kainer weis doch das sy dy weil die krieg gen den von Wienn weren und sy uns alls irem eribherrn und lanndesfürstn nicht gehorsam sein dawider durch sich oder ander nichts zufuern noch verkauffen auch mewtt und zöll so sich von sölhen kauffmanschefftn zegebn gepuret vorbehalltn und andern unsern steten an iren niderlegungn alls vor stet unvergriffenlich angeverde das main wir ernstlich."

Archival History/Literature

Cod. ms. jur. civ. 84. Bibl. Caes. Vindob.